Bugun.tv xəbər verir ki, Rusiyanın Nijni Novqorod vilayətində yerləşən 17 saylı cəzaçəkmə müəssisəsinin əməkdaşları həbsxanaya narkotik maddə çatdırmaq üçün istifadə edildiyi iddia olunan pişiyi saxlayıblar.
Rusiya Federal Penitensiar Xidmətinin (FSIN) regional idarəsinin məlumatına görə, pişiyin boynuna ev şəraitində hazırlanmış xüsusi boyunluq bağlanıb. Boyunluğun içərisində biri yaşıl rəngli, digəri isə ağ toz şəklində olan naməlum maddələr aşkar edilib.
Məlumata əsasən, pişik diqqət çəkmədən cəzaçəkmə müəssisəsinin ərazisinə daxil olaraq bağlamanı məhbuslara çatdırmalı idi. Lakin müəssisə əməkdaşlarının sayıqlığı nəticəsində bu cəhdin qarşısı vaxtında alınıb.
Hadisə yerinə narkotik aşkarlayan xidmət iti ilə birlikdə mütəxəssislər cəlb olunub. Aparılan ekspertiza nəticəsində götürülən nümunələrin narkotik maddə olduğu təsdiqlənib.
FSIN bildirib ki, pişik müvəqqəti olaraq saxlanılıb, boyunluq müsadirə edilib. Baytarlıq müayinəsindən sonra heyvanın sağlam olduğu müəyyənləşdirilib və o, sərbəst buraxılıb. Faktla bağlı araşdırma aparılır və narkotik bağlamanın kim tərəfindən hazırlandığı müəyyənləşdirilir.
Mənbə: TASS