Birləşmiş Ərəb Əmirliklərinin Dubay şəhərində yerləşən Atlantis The Royal otelinin iki mərtəbəli penthaus nömrəsi gecəlik 100 min dollar qiyməti ilə dünyanın ən bahalı standart otel nömrəsi hesab olunur.
Bugun.tv xəbər verir ki, ümumi sahəsi 1 604 kvadratmetr olan lüks nömrə eyni vaxtda 9 böyük və 4 uşağı qəbul edə bilir.
Penthausda dörd yataq otağı, şəhərə panoramik mənzərə açılan qızdırılan şəxsi hovuz, geniş terras, yay mətbəxi, şəxsi kinozal, kitabxana, fərdi lift, qarderob otaqları və 12 nəfərlik yemək zalı yerləşir.
Qonaqlara Hermès, Graff və Louis Vuitton kimi məşhur lüks brendlərin məhsulları təqdim olunur. Gecəlik qiymətə şəxsi aşpaz, 24 saat xidmət göstərən eşikağası (butler) və xüsusi mühafizə xidməti də daxildir.
Məlumata görə, bəzi beynəlxalq tədbirlər zamanı digər lüks otellərdə otaq qiymətləri müvəqqəti olaraq bu məbləği keçə bilsə də, Atlantis The Royal bu qiyməti standart tarif kimi ilboyu saxlayan nadir otellərdən biridir. Ekspertlər bunu Dubayda yüksək səviyyəli turizmə olan davamlı tələbatla əlaqələndirirlər.
Mənbə: EnSonHaber