Bugun.tv xəbər verir ki, Amazon peyk rabitəsi sahəsində fəaliyyətini genişləndirərək Amazon Leo layihəsi çərçivəsində mobil telefonlara birbaşa peyk bağlantısı təqdim etməyi planlaşdırır. Şirkət bununla SpaceX-in Starlink xidmətinə rəqib olmağı hədəfləyir.
Məlumata görə, Amazon ABŞ-ın Federal Rabitə Komissiyasına (FCC) 5 105 aşağı Yer orbitli peykdən ibarət yeni sistemin yaradılması üçün müraciət edib. Yeni şəbəkə mobil operatorlarla əməkdaşlıq çərçivəsində səsli zəng, mesajlaşma, internet və fövqəladə hallarda rabitə xidmətlərini mobil telefonlara birbaşa peyk vasitəsilə çatdırmağı nəzərdə tutur.
Şirkətin planına əsasən, peyklərin orbitə çıxarılmasına 2028-ci ildən başlanılması nəzərdə tutulur. Bu texnologiya mobil şəbəkənin əhatə etmədiyi ucqar ərazilərdə istifadəçilərin rabitə imkanlarını genişləndirə bilər.
Hazırda birbaşa peyk bağlantısı bazarında SpaceX, AST SpaceMobile və Lynk Global kimi şirkətlər də fəaliyyət göstərir. Amazonun bu addımı isə peyk rabitəsi sahəsində rəqabəti daha da gücləndirə bilər.
Mənbə: Reuters