Bugun.tv xəbər verir ki, siyasi ekspert Məhəmməd Əsədullazadə Rusiyada Azərbaycan diasporuna qarşı yeni təzyiqlərin və həbslərin həyata keçirilməsinin Moskva ilə Bakı arasında münasibətlərdə gərginliyi yenidən artırdığını bildirib.
Öz sosial media hesabında ekspert qeyd edir ki, Rusiya Azərbaycana qarşı yenidən böhran siyasətinə qayıdır. Onun sözlərinə görə, Azərbaycan Cənubi Qafqazda yeni geosiyasi reallıq yaradıb və Moskva bu reallıqla hesablaşmalıdır.
Məhəmməd Əsədullazadə qeyd edib ki, Azərbaycanla Rusiya arasında siyasi böhran müəyyən müddət ərzində aradan qalxmışdı və Moskva da bunu rəsmi şəkildə vurğulayırdı. Lakin son hadisələr və Rusiyanın kütləvi informasiya vasitələrində Azərbaycan əleyhinə kampaniyanın başlaması münasibətlərin yenidən gərginləşdiyini göstərir.
Ekspertin fikrincə, Rusiyanın Azərbaycan diasporuna qarşı təzyiqləri də bu siyasətin davamıdır. O bildirib ki, Cənubi Qafqazda formalaşan yeni siyasi nizam Moskvanı qane etmir və bu nizamın əsas iştirakçılarından biri olan Azərbaycanla münasibətlərdə gərginlik bundan sonra da davam edə bilər.
Əsədullazadə Rusiyanın Bakı ilə münasibətlərinin pisləşməsinə təsir edən amillər arasında Azərbaycanın Ukrayna və Ermənistanla siyasətini də göstərib. Onun sözlərinə görə, Azərbaycan Ukrayna ilə siyasi və humanitar sahələrdə əməkdaşlığı davam etdirəcək.
Ekspert həmçinin Rusiya Prezidenti Vladimir Putinin qonşu ölkələrə qarşı sərt siyasətinin Moskvanın regiondakı etimadına mənfi təsir göstərdiyini bildirib.