Bugun.tv xəbər verir ki, ABŞ İrana qarşı iqtisadi təzyiqləri kəskin şəkildə artırmağa hazırlaşır. Vaşinqton yeni sanksiyalarla İranın xarici dünya ilə iqtisadi əlaqələrini daha da məhdudlaşdırmağı və Tehrana təzyiqi gücləndirməyi planlaşdırır.
CNN-in 24 avqust tarixli məlumatına görə, ABŞ Maliyyə naziri Skott Bessent yeni tədbirlərin detallarını açıqlamağa hazırlaşır. Bessent “Financial Times” üçün yazdığı məqalədə İrana qarşı planlaşdırılan kampaniyanı “iqtisadi D-Day” adlandırıb və bunun ABŞ-ın indiyədək rəqib dövlətə qarşı həyata keçirdiyi ən böyük maliyyə hücumu olacağını bildirib.
Nazirin sözlərinə görə, Vaşinqtonun əsas məqsədi İran iqtisadiyyatını ayaqda saxlayan bütün əsas maliyyə kanallarını kəsməkdir. ABŞ administrasiyası bununla yanaşı İranla iqtisadi əlaqələri davam etdirən digər ölkələrə və şirkətlərə də təzyiq göstərməyi nəzərdən keçirir.
CNN-in məlumatına görə, ABŞ-ın strategiyasında hərbi təzyiqdən iqtisadi təzyiqə keçid müşahidə olunur. Vaşinqton sanksiyalar vasitəsilə İranı danışıqlar masasına qayıtmağa məcbur etməyə çalışır.
ABŞ-ın yeni addımları İranın onsuz da ciddi iqtisadi problemlərlə üzləşdiyi bir vaxta təsadüf edir. Ölkənin milli valyutası rekord səviyyədə ucuzlaşıb və iqtisadi təzyiq daha da artır.
Bununla belə, Tehranın ABŞ-ın yeni sanksiyalarına necə cavab verəcəyi regionda gərginliyin daha da yüksəlməsi ilə bağlı narahatlıq yaradır.
Mənbə: sky.news