Bugun.tv xəbər verir ki, “Səhhət Sağlamlığa Dəstək” İctimai Birliyinin sədri, vərəm xəstəlikləri üzrə həkim Taryel Həsənov vərəm xəstələrinin müalicəsində səbir, davamlılıq və həkim tövsiyələrinə ciddi əməl olunmasının vacibliyini vurğulayıb.
Taryel Həsənov bildirib ki, vərəmin müalicəsi müəyyən müddət və intizam tələb edir. Onun sözlərinə görə, xəstələr özlərini yaxşı hiss etsələr belə, həkim məsləhəti olmadan dərman qəbulunu dayandırmamalıdırlar.
Həkim qeyd edib ki, müalicənin yarımçıq saxlanılması xəstəliyin tam nəzarətə alınmasını çətinləşdirə və müalicəyə davamlı vərəm formalarının yaranması riskini artıra bilər. Bu səbəbdən müalicə prosesi həkim nəzarəti altında aparılmalı və hər bir xəstənin vəziyyətinə uyğun fərdi yanaşma tətbiq edilməlidir.
Taryel Həsənov müasir tibbin imkanları sayəsində vərəm xəstələrinin böyük əksəriyyətinin uğurla müalicə oluna bildiyini bildirib. O, müalicə zamanı xəstələrin psixoloji vəziyyətinə də diqqət yetirilməsinin vacibliyini vurğulayıb.
Həkimin sözlərinə görə, ailə üzvlərinin dəstəyi, cəmiyyətin düzgün münasibəti və tibbi heyətin nəzarəti müalicənin uğurlu nəticələnməsində mühüm rol oynayır.
Taryel Həsənov vərəmlə mübarizədə əsas şərtlərin vaxtında həkimə müraciət, düzgün diaqnostika və müalicəyə məsuliyyətli yanaşma olduğunu qeyd edib.
O, cəmiyyəti vərəm xəstələrinə qarşı mənfi münasibətdən uzaq olmağa və onları düzgün məlumatlandırmağa çağırıb: “Cəmiyyət olaraq xəstəliyə deyil, məlumatsızlığa qarşı mübarizə aparmalıyıq.”
Həkim hesab edir ki, insanlarda qorxu yaratmaq əvəzinə, vərəm haqqında düzgün məlumatların yayılması xəstəliyin qarşısının alınması və müalicəyə riayət baxımından daha effektiv nəticə verə bilər.