Bugun.tv xəbər verir ki, Yaponiyanın Kanazava şəhərində yanğınsöndürmə xidməti sakinlərdən təcili yardım əməkdaşlarının evlərə daxil olarkən çıxardığı ayaqqabıları səliqəyə salmamağı xahiş edib. The Guardian-ın məlumatına görə, səbəb olduqca sadədir: ayaqqabıların xüsusi vəziyyətdə saxlanılması xilasedicilərə xəstəni xərəkdə çıxardıqdan sonra onları mümkün qədər tez geyinməyə imkan verir.
Yaponiyada evə daxil olarkən ayaqqabıları çıxarmaq geniş yayılmış qaydadır. Təcili yardım əməkdaşları da xəstəyə çatmaq üçün bəzi evlərdə ayaqqabılarını çıxarmalı olurlar. Lakin onlar ayaqqabıları qapının qarşısında təsadüfi deyil, çıxış istiqamətində yerləşdirirlər.
Xidmətin açıqlamasına əsasən, ailə üzvləri yaxşı niyyətlə ayaqqabıları düzəldərək kənara çevirsələr, əməkdaşlar geri qayıdarkən onları dərhal geyinə bilmirlər. Bu isə xəstənin evdən çıxarılmasını təxminən 30 saniyə gecikdirə bilər.
Yanğınsöndürmə xidməti sakinlərə müraciət edərək təcili yardım əməkdaşlarının ayaqqabılarına toxunmamağı və onları olduğu kimi saxlamağı tövsiyə edib. Bildirilib ki, belə kiçik görünən detal fövqəladə vəziyyətdə qiymətli vaxt qazandıra bilər.
Mənbə: The Guardian