Bugun.tv xəbər verir ki, Rusiyada süni intellekt modellərinin dərman hazırlanması zamanı antikorların düzgün hədəfi müəyyənləşdirib-müəyyənləşdirmədiyini yoxlamağa imkan verən yeni alət hazırlanıb.
“Mail.ru”nun yaydığı məlumata görə, layihə Sberbankın Praktiki Süni İntellekt Mərkəzi və AIRI İnstitutunun mütəxəssisləri tərəfindən hazırlanıb.
Yeni sistem antikorun hansı zülala bağlanmalı olduğunu müəyyənləşdirmək qabiliyyətini qiymətləndirir. Bu, xüsusilə bir-birinə oxşayan zülallar arasında düzgün hədəfin seçilməsində əhəmiyyətlidir.
Tədqiqatçılar bildirirlər ki, süni intellekt dərman hazırlanması prosesinin müxtəlif mərhələlərində getdikcə daha çox istifadə olunur. Lakin modelin verdiyi cavabın düzgünlüyünü ayrıca yoxlamaq vacibdir.
Hazırlanan alətin əsas məqsədi məhz bu yoxlamanı daha sistemli şəkildə həyata keçirməkdir. Mütəxəssislərin fikrincə, belə sistemlər gələcəkdə antikor əsaslı dərmanların hazırlanmasına sərf olunan vaxtın və resursların azaldılmasına kömək edə bilər.
Süni intellektin biotexnologiyada tətbiqi sürətlə genişlənir. Alimlər hesab edirlər ki, yeni yoxlama üsulları dərman namizədlərinin seçilməsi və onların təhlükəsizliyinin araşdırılması prosesini daha səmərəli edə bilər.
Mənbə: mail.ru