Bugun.tv xəbər verir ki, Qəzzadakı müharibə və mülki itkilərlə bağlı iddiaları araşdıran “Naza” sənədli filmi Venesiya Film Festivalında nümayişdən sonra təxminən 25 dəqiqəlik ayaqüstü alqışlarla qarşılanıb.
İsrailli rejissorlar Yuval Abraham və Rachel Szor tərəfindən çəkilən 80 dəqiqəlik sənədli film 10 sentyabrda 83-cü Venesiya Film Festivalının əsas müsabiqə proqramında nümayiş etdirilib. Filmin nümayişindən sonra tamaşaçılar rejissorları uzun müddət ayaqüstə alqışlayıblar. Al Jazeera-nın məlumatına görə, bu, festival tarixində ən uzun alqışlardan biri hesab olunur və ötən il Qəzza mövzusundakı başqa bir filmə verilən 23 dəqiqəlik alqış müddətini də geridə qoyub.
“Naza” filmi təxminən üç il davam edən araşdırmaya əsaslanır. Ekran əsərində İsrail hərbi və kəşfiyyat strukturlarında çalışmış 24 nəfərin anonim ifadələrindən istifadə olunub. Rejissorlar həmin şəxslərin kimliyini qorumaq üçün onların üz və səslərini dəyişdiriblər.
Filmdə Qəzzada hədəflərin müəyyənləşdirilməsi zamanı süni intellekt əsaslı sistemlərdən istifadə olunması və mülki şəxslərin ölümünün hərbi əməliyyatlarda hansı şəkildə nəzərə alındığı barədə iddialar araşdırılır. Rejissorlar bildiriblər ki, məqsədləri həmin sistemlərin necə işlədiyini və müharibə şəraitində qərarların necə qəbul edildiyini birbaşa bu sahədə çalışmış şəxslərin dilindən göstərmək olub.
Film Venesiya festivalında böyük maraq doğurub və Qəzzadakı müharibənin yaratdığı siyasi və humanitar müzakirələri kino müstəvisində yenidən gündəmə gətirib. “Naza” bu il festivalın əsas müsabiqəsində yarışan yeganə sənədli film kimi də diqqət çəkir.
Mənbə: Al Jazeera