Bugun.tv xəbər verir ki, tez hazırlanan əriştəni bir neçə sadə əlavə ilə daha balanslı yeməyə çevirmək mümkündür. Sport24-də yayımlanan məqalədə hazır əriştənin əsas çatışmazlığının onun standart formada zülal və lif baxımından kasad, duz baxımından isə yüksək olması olduğu qeyd edilir.
Hazır əriştələrin böyük hissəsi rafinə olunmuş buğda unundan hazırlanır. Emal zamanı dənin tərkibindəki lifin və bəzi vitamin-mineralların miqdarı azalır. Ədviyyat paketində isə duz əsas yükü təşkil edir. Ümumdünya Səhiyyə Təşkilatının tövsiyəsinə əsasən, böyüklər üçün gündəlik natrium qəbulu 2000 milliqramı keçməməlidir. Bir porsiya hazır əriştədə isə təxminən 600-1500 milliqram natrium ola bilər.
Mütəxəssislər bu səbəbdən əriştəni hazırlayarkən bütün ədviyyat paketindən istifadə etməməyi məsləhət görürlər. Onun yarısını və ya daha az hissəsini əlavə etmək duz miqdarını azaltmağa kömək edə bilər. Dadı artırmaq üçün sarımsaq, zəncəfil, limon şirəsi və ya az duzlu soya sousundan istifadə etmək mümkündür.
Yeməyi daha dolğun etmək üçün tərəvəz əlavə etmək də tövsiyə olunur. Brokoli, kök, ispanaq, yaşıl noxud və dondurulmuş tərəvəz qarışıqları əriştəyə əlavə edilə bilər. Bu məhsullar yeməyin həcmini artırır, lif və müxtəlif qida maddələri ilə zənginləşdirir.
Digər vacib komponent isə zülaldır. Yumurta, toyuq əti, tofu və ya paxlalılar əlavə edildikdə yemək daha uzun müddət toxluq hissi verə bilər. Zülal həmçinin karbohidratların mənimsənilməsini nisbətən yavaşlada bilər.
Məqalədə tam taxıllı, qarabaşaq və ya düyü əsaslı əriştələrin də alternativ seçim ola biləcəyi qeyd edilir. Beləliklə, hazır əriştəni tək yemək əvəzinə onu tərəvəz və zülal mənbəyi ilə tamamlayaraq 5-10 dəqiqə ərzində daha balanslı bir yemək hazırlamaq mümkündür.
Mənbə: sport24.ru