Bugun.tv xəbər verir ki, beynə təsir göstərən texnologiyalar inkişaf etdikcə onların hansı məqsədlərlə və hansı şərtlərlə tətbiq edilməsinin etik sərhədləri də aktuallaşır.
Optogenetika alimlərə müəyyən hüceyrə tiplərinə və neyron şəbəkələrinə yüksək dəqiqliklə təsir göstərməyə imkan verir. Rusiya alimlərinin fikrincə, bu texnologiyaların istifadəsində əsas meyar müdaxilənin tibbi məqsəd daşıması və pasiyentin şüurlu razılığının olmasıdır.
Rusiya Elmlər Akademiyasının müxbir üzvü, “Beyin və neyrotexnologiyalar Federal Mərkəzi”nin baş direktoru Vsevolod Belousov bildirib ki, ağır xəstəliyi olan pasiyentdə müəyyən neyron dövrəsinin patoloji aktivliyinin yatırılması və itirilmiş funksiyanın bərpası tibbi müdaxilə hesab olunur.
Lakin neyrotexnologiyalardan insanın normal davranışını, emosiyalarını, motivasiyasını və ya şəxsiyyətini onun şüurlu razılığı olmadan dəyişdirmək üçün istifadə edilməsi tamam başqa məsələdir.
Mütəxəssis vurğulayıb ki, müasir elm hələ insan davranışına tam nəzarət etmək imkanına malik deyil. Beyin son dərəcə mürəkkəb sistemdir və onun fəaliyyətini bir düymə ilə idarə etmək mümkün deyil.
Moskva Fizika-Texnika İnstitutunun nümayəndəsi Denis Kuzmin isə etik sərhədin yalnız davranışın dəyişməsi ilə müəyyənləşdirilməməli olduğunu qeyd edib. Depressiya və ya asılılığın uğurlu müalicəsi də insanın davranışına təsir göstərə bilər.
Alimlərin fikrincə, əsas şərtlər könüllülük, tibbi əsaslandırma, risk və faydanın müqayisəsi, müstəqil nəzarət və pasiyentin müdaxilədən imtina etmək hüququdur.
Mənbə: Science Mail.ru