Bugun.Tv xəbər verir ki, Uels sahillərində 1999-cu ildə tapılan, təxminən 440 illik latun qıfılın sirri nəhayət açılıb. Mütəxəssislər artefaktın zərər görməməsi üçün onun daxili mexanizmini kompüter tomoqrafiyası vasitəsilə araşdırıblar.
Qıfılın dörd hərfli şifrəsi ANCE olub. Tədqiqatçılar düzgün ardıcıllığı üçüncü cəhddə müəyyən edə biliblər.
Qıfılın sirrini müasir texnologiya açıb
Qıfıl 1999-cu ildə metal axtarışı ilə məşğul olan Piter Hyuz tərəfindən Uelsin Port-Talbot bölgəsində, gümüş sikkələrlə birlikdə aşkarlanıb. Onun 1583-cü il dekabrın 28-də İspaniyadan qayıdarkən fırtına nəticəsində qəzaya uğrayan “Ann Francis” ticarət gəmisinə aid olduğu ehtimal edilir.
Dörd fırlanan halqadan ibarət qıfılın hər birində altı hərf yerləşir. Bu isə çoxsaylı şifrə variantları yaradır. Hyuz uzun illər ərzində düzgün kombinasiyanı tapmağa çalışsa da, buna nail ola bilməyib.
Uels Milli Muzeyi və Kardiff Universitetinin mütəxəssisləri mikrotomoqrafiya vasitəsilə qıfılın daxilindəki mexanizmin üçölçülü görüntüsünü əldə ediblər. Beləliklə, tarixi əşyaya zərər vermədən onun şifrəsini müəyyənləşdirmək mümkün olub.
Qıfılın qiymətli əşyaların saxlandığı kiçik sandığı qoruduğu düşünülür. O, hazırda Uelsin Su Sahili Milli Muzeyində nümayiş etdirilir.
Mənbə: mail.ru