Bugun.tv xəbər verir ki, ABŞ Nəqliyyat Təhlükəsizliyi Administrasiyası (TSA) tibbi məqsədlə istifadə olunan marixuananın kommersiya uçuşlarında daşınmasına müəyyən şərtlərlə icazə verib.
Məlumata görə, ABŞ-da tibbi marixuana istifadəsi 40 ştat və Kolumbiya Dairəsində qanuni olsa da, hava limanları federal qanunlara tabe olduğundan bu maddə indiyədək qadağan olunmuş nəzarətli maddələr siyahısında qalırdı.
Yeni qaydalara əsasən, həkim resepti olan tibbi marixuana məhsulları sərnişinlər tərəfindən həm əl yükündə, həm də qeydiyyata verilən baqajda daşına biləcək.
Bununla belə, Nəqliyyat Təhlükəsizliyi İdarəsi vurğulayıb ki, bu qərar marixuananın tam sərbəstləşdirilməsi anlamına gəlmir.
Qurumun açıqlamasında qeyd olunub ki, əsas məqsəd narkotik axtarışı deyil, uçuş təhlükəsizliyinin təmin edilməsidir. TSA əməkdaşları daşınan məhsulların təhlükəsizlik baxımından risk yaradıb-yaratmadığını yoxlayacaq.
Yenilənmiş qaydalarda bildirilib ki, təhlükəsizlik yoxlaması zamanı qanunsuz maddə və ya cinayət fəaliyyəti ilə bağlı hər hansı sübut aşkarlanarsa, məsələ hüquq-mühafizə orqanlarına ötürüləcək.
Ekspertlər hesab edir ki, bu dəyişiklik tibbi marixuanadan istifadə edən sərnişinlərin səyahətini asanlaşdıracaq və hava nəqliyyatında yeni hüquqi yanaşmanın başlanğıcı ola bilər.
Mənbə: Ensonhaber