Bugun.tv xəbər verir ki, ABŞ və İran arasında İsveçrənin Obbürgen şəhərində keçirilməsi planlaşdırılan danışıqlar son anda təxirə salınıb. Məlumata görə, qərar İsrail və Hizbullah arasında Livanın cənubunda baş verən yeni silahlı qarşıdurmalar fonunda qəbul olunub.
ABŞ vitse-prezidenti JD Vensin əməkdaşları sammitə yollanmaq üçün hava bazasında hazır vəziyyətdə olsalar da, səfər qəfil ləğv edilib. İsrail ordusu Hizbullahın atəşkəsi dəfələrlə pozduğunu bildirərək Livanın cənubundakı mövqelərə zərbələr endirib. Hizbullah isə hücumların ABŞ və İran arasında əldə edilmiş razılaşmanı təhlükə altına saldığını bəyan edib.
Hadisələr Yaxın Şərqdə vəziyyətin yenidən gərginləşdiyini göstərir və Vaşinqtonla Tehran arasında münasibətlərin gələcəyi ilə bağlı suallar yaradır. ABŞ və Avropa İttifaqı tərəfləri razılaşmaya əməl etməyə çağırıb.
Mənbə: The Guardian