Bugun.tv xəbər verir ki, ABŞ və İran arasında aylardır davam edən qarşıdurmada yeni hərbi eskalasiya baş verib. ABŞ qüvvələri İranın Hörmüz boğazında yerləşən Larak adasında iki raket buraxılış qurğusuna zərbə endirib. Vaşinqtonun bildirdiyinə görə, İran İnqilab Keşikçiləri Korpusu həmin qurğulardan dəniz minalarını Hörmüz boğazına yerləşdirmək üçün istifadə etməyə hazırlaşırdı.
Bu, ABŞ-ın iyulun sonlarından bəri İrana qarşı həyata keçirdiyi ilk məlum birbaşa zərbə olub. İran tərəfi hücum zamanı hərbçilər və mülki şəxslərin öldüyünü və yaralandığını açıqlayaraq ABŞ-a cavab veriləcəyini bildirib.
Bundan sonra İran ABŞ-ın İordaniyada istifadə etdiyi iki hərbi bazaya ballistik raketlərlə zərbələr endirdiyini açıqlayıb. İordaniya ordusu ölkənin hava məkanına daxil olan səkkiz raketin qarşısının alındığını bildirib. İran həmçinin Birləşmiş Ərəb Əmirliklərində yerləşən ABŞ hərbi obyektlərinə pilotsuz uçuş aparatları ilə hücum etdiyini açıqlayıb. BƏƏ isə İranın Əl-Minad hava bazasına zərbə endirməsi barədə məlumatını təsdiqləməyib.
ABŞ Mərkəzi Komandanlığı Larak adasına endirilən zərbələri “məhdud və dəqiq əməliyyat” adlandıraraq məqsədin Hörmüz boğazında dəniz minalarının yerləşdirilməsi təhlükəsinin qarşısını almaq olduğunu bildirib. İran isə hücumu ölkənin suverenliyinin pozulması kimi qiymətləndirib.
Gərginliyin artması qlobal enerji bazarlarına da təsir göstərib. Reuters-in son məlumatına görə, Brent markalı neftin qiyməti 90 dolları keçərək 90,32 dollara yüksəlib. İnvestorlar Hörmüz boğazında gəmiçilik və neft daşımalarının daha da məhdudlaşa biləcəyindən narahatdırlar. Boğaz dünya neft ticarətinin ən mühüm keçidlərindən biri hesab olunur.
ABŞ və İran arasında yeni qarşıdurma diplomatik danışıqların da ciddi şəkildə zəiflədiyi bir vaxtda baş verir. Tərəflər arasında gərginliyin daha da artması Hörmüz boğazında təhlükəsiz gəmiçiliklə yanaşı, dünya enerji bazarında qiymətlərin yüksəlməsi riskini də artırır.
Mənbələr: Reuters