ABŞ Mərkəzi Komandanlığı İranın ABŞ hərbi gəmisini vurduğu barədə yayılan məlumatları təkzib edib.
İranın yarı-rəsmi Fars Xəbər Agentliyi xəbər verib ki, Hörmüz boğazı yaxınlığında İranın xəbərdarlıqlarına məhəl qoymayan ABŞ Hərbi Dəniz Qüvvələrinə məxsus freqat iki raketlə hədəfə alınıb. Məlumata görə, hadisə Cask bölgəsi yaxınlığında baş verib və zərbə alan gəmi marşrutunu davam etdirə bilməyərək ərazidən uzaqlaşıb.
Lakin ABŞ Mərkəzi Komandanlığı sosial media platforması X-də yaydığı açıqlamada bu iddiaların həqiqəti əks etdirmədiyini bildirib. Qurumun bəyanatında vurğulanıb ki, ABŞ Hərbi Dəniz Qüvvələrinə məxsus heç bir gəmi vurulmayıb.
Açıqlamada həmçinin qeyd olunub ki, ABŞ qüvvələri Hörmüz boğazında ticarət gəmilərinin təhlükəsiz hərəkətini təmin etmək məqsədilə həyata keçirilən Azadlıq Layihəsi əməliyyatına dəstək verir və İran limanlarına tətbiq olunan dəniz nəzarəti davam etdirilir.
Bundan əvvəl İran İslam İnqilabı Keşikçiləri Korpusunun sözçüsü Hüseyn Mühibbi bəyan etmişdi ki, Hörmüz boğazında müəyyən edilmiş qaydaları pozan gəmilər güc tətbiq olunaraq dayandırılacaq.
İran tərəfi isə bildirir ki, ölkənin Hərbi Dəniz Qüvvələrinin sürətli xəbərdarlığı nəticəsində ABŞ-a məxsus gəmilərin boğaza daxil olmasının qarşısı alınıb.
Bundan başqa, İran Hərbi Dəniz Qüvvələri Hörmüz boğazında nəzarət etdiyi əraziləri əks etdirən xəritə də yayıb. Xəritədə İranın Mübarək dağı ilə Birləşmiş Ərəb Əmirlikləri ərazisində yerləşən Cənub Füceyrə xətti, eləcə də Keşm adası ilə Ümm əl-Qüveyn arasındakı zonanın İran silahlı qüvvələrinin nəzarətində olduğu qeyd edilib.
Mənbə: TrtHaber