ABŞ Mərkəzi Komandanlığı (United States Central Command (CENTCOM)) bildirib ki, ABŞ qüvvələri Oman körfəzində İran limanlarına istiqamətlənən üç neft tankerinə qarşı əməliyyat apararaq onları sıradan çıxarıb.
Məlumata görə, 8 may tarixində M/T Sea Star III və M/T Sevda adlı gəmilər ABŞ-ın tətbiq etdiyi dəniz məhdudiyyətlərini pozaraq İran limanlarına daxil olmağa çalışıb. Bildirilir ki, ABŞ Hərbi Dəniz Qüvvələrinə məxsus USS George H.W. Bush (CVN-77) üzərində yerləşən F/A-18 “Super Hornet” qırıcıları həmin tankerləri dəqiq zərbələrlə zərərsizləşdirib.
Bundan əlavə, 6 mayda “Hasna” adlı İran tankerinin də hədəf alındığı qeyd olunur. Bu əməliyyatda USS Abraham Lincoln (CVN-72) gəmisinə məxsus F/A-18 təyyarəsinin 20 mm-lik top atəşi ilə tankerin sükan hissəsini sıradan çıxardığı bildirilib.
CENTCOM-un açıqlamasına görə, üç gəmi hazırda İrana doğru hərəkət edə bilmir. ABŞ tərəfi daha əvvəl 13 apreldə İranla bağlı dəniz məhdudiyyətləri tətbiq etdiyini və bu çərçivədə İran limanlarına giriş-çıxış edən gəmilərin izlənəcəyini açıqlamışdı.
Mənbə: TASS