Bugun.tv xəbər verir ki, ABŞ Senatı prezident Donald Trampın Konqresin icazəsi olmadan İrana qarşı yeni hərbi əməliyyatlara başlamasını məhdudlaşdıran qətnaməni qəbul edib.
Məlumata görə, Senatda keçirilən səsvermədə qətnamə 50 səs lehinə, 48 səs əleyhinə olmaqla qəbul olunub. Bununla da, 1973-cü ildə qəbul edilən Müharibə Səlahiyyətləri Aktından sonra ilk dəfə olaraq Konqresin hər iki palatası prezidentdən ABŞ silahlı qüvvələrinin hərbi əməliyyatlardan çıxarılmasını tələb edən sənədə dəstək verib.
Qətnamə daha əvvəl Nümayəndələr Palatasında da qəbul edilmişdi. Sənəd hüquqi baxımdan məcburi qüvvəyə malik olmasa da, ABŞ Konqresində Tramp administrasiyasının İran siyasəti ilə bağlı narahatlıqların artdığını nümayiş etdirir.
Səsvermə zamanı dörd respublikaçı senator demokratlarla birlikdə qətnamənin lehinə səs verib. Pensilvaniya ştatından demokrat senator Con Fetterman isə əleyhinə çıxıb.
ABŞ Prezidenti Donald Tramp Senatın qərarını tənqid edərək onu “vaxtsız və mənasız” adlandırıb. O, sənədi dəstəkləyən senatorları İrana üstünlük verməkdə və administrasiyanın fəaliyyətini çətinləşdirməkdə ittiham edib.
Ağ Ev isə bildirib ki, qətnamə prezidentin imzasına təqdim olunmadığı və qanun qüvvəsinə malik olmadığı üçün administrasiya üçün hüquqi öhdəlik yaratmır.
Qeyd edək ki, Tramp administrasiyası hazırda Tehranla mümkün sülh sazişi üzrə danışıqlar aparır. Konqresdə qəbul edilən qətnamənin prezidentə İrana qarşı yeni hərbi əməliyyatlardan çəkinməsi istiqamətində siyasi təzyiqi artıracağı gözlənilir.
Mənbə: World News