Bugun.tv xəbər verir ki, ABŞ-ın İrana endirdiyi son hərbi zərbələrin əvvəlki əməliyyatlarla müqayisədə daha genişmiqyaslı olduğu bildirilir. ABŞ rəsmilərinin məlumatına görə, zərbələr yalnız ayrı-ayrı hərbi obyektləri deyil, eyni zamanda İranın hərbi-logistika infrastrukturunu da hədəfə alıb.
Əməliyyatlar zamanı İranın cənubunda yerləşən strateji hərbi mövqelər, silah anbarları və logistika mərkəzləri vurulub. ABŞ administrasiyası bu addımların Hörmüz boğazında ticarət gəmilərinə qarşı həyata keçirilən hücumlara cavab olaraq atıldığını bildirib.
Amerikalı rəsmilər vurğulayıblar ki, son əməliyyatlar əvvəlkilərdən daha geniş ərazini əhatə edib və İranın hərbi imkanlarına ciddi zərbə vurmağı hədəfləyib. Vaşinqton bölgədə yerləşən ABŞ qüvvələrinin və beynəlxalq dəniz nəqliyyatının təhlükəsizliyinin təmin edilməsinin prioritet olduğunu bəyan edib.
İran tərəfi isə ABŞ-ın hərbi əməliyyatlarını beynəlxalq hüququn pozulması kimi qiymətləndirərək cavab tədbirləri görəcəyini açıqlayıb. Tehran Vaşinqtonu əldə olunmuş razılaşmaların şərtlərinə əməl etməməkdə ittiham edib və ABŞ-ın bölgədə gərginliyi daha da artırdığını bildirib.
Analitiklərin fikrincə, son hadisələr ABŞ və İran arasında münasibətlərdə gərginliyin yeni mərhələyə keçdiyini göstərir. Ekspertlər hesab edirlər ki, tərəflər arasında diplomatik təmaslar davam etsə də, bölgədə hərbi risklərin artması Yaxın Şərqdə təhlükəsizlik vəziyyətini daha da mürəkkəbləşdirə bilər.
Mənbə: TASS