Наука Mail tərəfindən yayımlanan məlumatda bildirilir ki, ağıllı saatlar və fitnes trekerlər hər zaman dəqiq nəticələr göstərmir və bir çox göstəriciləri təxmini hesablayır.
Mütəxəssislərin sözlərinə görə, bu cihazlar fiziki aktivlik, yandırılan kalori, bərpa səviyyəsi və yüklənməyə hazır olma kimi göstəriciləri təqdim etsə də, bu məlumatlar çox vaxt səhvlərlə müşayiət olunur.
ƏN ÇOX SƏHV OLAN GÖSTƏRİCİLƏR
Kalori hesablanması
Kalori sərfiyyatı bəzi hallarda 20%-dən çox fərqlə səhv göstərilə bilər. Xüsusilə güc məşqləri, velosiped sürmə və interval yüklənmələr zamanı bu fərq daha böyük olur.
Addım sayı
Ağıllı saatlar addımları orta hesabla 10% az göstərə bilər. Əl hərəkətinə əsaslandığı üçün ağır yük daşıyarkən və ya uşaq arabası itələyərkən dəqiqlik daha da azalır.
Nəbz ölçümü
Nəbz əsasən istirahət zamanı və aşağı intensivlikdə daha düzgün ölçülür. Güclü fiziki yüklənmə, tərləmə, dəri rəngi və saatın biləyə tam oturmaması nəticələri təhrif edə bilər.
YUXU VƏ BƏRPA GÖSTƏRİCİLƏRİ ETİBARLI DEYİL
Yuxu keyfiyyəti əsasən hərəkət və nəbzə görə qiymətləndirilir. Halbuki tibbdə istifadə olunan polisomnoqrafiya kimi üsullar beyin fəaliyyətini ölçür. Buna görə də yuxunun dərin və ya yüngül mərhələləri dəqiq təyin edilmir.
Bərpa səviyyəsi isə ürək ritminin dəyişkənliyi və yuxu göstəricilərinə əsaslanır ki, bu da hər zaman etibarlı sayılmır.
VO₂max GÖSTƏRİCİSİ DƏ TƏXMİNİDİR
Maksimal oksigen istifadə qabiliyyəti (VO₂max) ağıllı saatlarda yalnız nəbz və hərəkət məlumatlarına əsasən hesablanır. Bu səbəbdən:
az aktiv insanlarda göstərici şişirdilə bilər
idmançılarda isə aşağı göstərilə bilər
MÜTƏXƏSSİSLƏR NƏ DEYİR?
Alimlər qeyd edir ki, ağıllı saatlar uzunmüddətli tendensiyaları izləmək üçün faydalıdır. Lakin ən vacib göstərici insanın özünü necə hiss etməsidir.
Onların fikrincə, real fiziki vəziyyət, yorğunluq səviyyəsi və bərpa hissi texnoloji cihazlardan daha etibarlı məlumat verir.
Mənbə: mail.ru