Bugun.tv xəbər verir ki, Avropa İttifaqı Rusiyaya qarşı 21-ci sanksiyalar paketini hazırlayıb.
Yeni tədbirlər paketi bank sektoru, enerji sahəsi, neft ticarəti, kriptovalyuta platformaları və hərbi sənaye ilə əlaqəli qurumları hədəf alır.
Avropa Komissiyasının təqdim etdiyi təklifə əsasən, Rusiyanın enerji gəlirlərini azaltmaq məqsədilə neft qiymət tavanının qüvvədə saxlanılması, mayeləşdirilmiş təbii qaz (LNG) əməliyyatlarına əlavə məhdudiyyətlərin tətbiqi və Rusiyanın “kölgə donanması”na daxil olan daha 30 gəminin sanksiya siyahısına salınması nəzərdə tutulur.
Paket çərçivəsində Rusiya və digər ölkələrdə fəaliyyət göstərən 90-a yaxın bankın aktivlərinin dondurulması, həmçinin onlarla maliyyə qurumuna qarşı əlavə əməliyyat qadağalarının tətbiqi təklif edilir. Aİ rəsmiləri hesab edir ki, bu addımlar Moskvanın sanksiyalardan yayınmaq imkanlarını məhdudlaşdıracaq.
Yeni sanksiyalar paketinin qüvvəyə minməsi üçün Aİ-yə üzv 27 ölkənin yekdil razılığı tələb olunur. Müzakirələrin yaxın günlərdə davam etdirilməsi planlaşdırılır.
Mənbə: Reuters