Avropa İttifaqı Ukraynanın quruma üzvlüyünə dəstəyin tam olduğunu, lakin prosesin nə vaxt başa çatacağı ilə bağlı konkret tarix verməyin mümkün olmadığını açıqlayıb.
Volodimir Zelenski, Ursula von der Leyen və Antonio Costa Rusiya-Ukrayna müharibəsinin 4-cü ildönümü münasibətilə Kiyevdə keçirdikləri mətbuat konfransında məsələyə münasibət bildiriblər.
Von der Leyen son 4 ildə Aİ tərəfindən Ukraynaya hərbi və maliyyə dəstəyi çərçivəsində təxminən 200 milyard avro ayrıldığını və bunun digər tərəfdaşlardan daha çox olduğunu qeyd edib. Onun sözlərinə görə, 90 milyard avroluq Aİ krediti artıq 27 üzv ölkənin dövlət və hökumət başçıları tərəfindən təsdiqlənib.
Bildirilib ki, bu kredit Ukraynanın təcili müdafiə ehtiyaclarının qarşılanmasına, müasir müdafiə avadanlıqlarının tədarükü və istehsalına yönəldiləcək. Pasxadan əvvəl pilotsuz uçuş aparatları və sursatları əhatə edən dəstək paketinin çatdırılması planlaşdırılır.
Von der Leyen əlavə edib ki, 100 milyon avroluq yeni təcili yardım paketi qış dövründə Ukraynaya dəstək məqsədi daşıyır. 2026-2027-ci illər üçün isə enerji sisteminin sabitləşdirilməsi istiqamətində 920 milyon avroluq “bərpa və yenidənqurma” qış enerji planı hazırlanacaq.
Aİ Komissiyası rəhbəri Rusiyaya qarşı təzyiqlərin davam etdiriləcəyini vurğulayıb və yaxın vaxtlarda 20-ci sanksiya paketinin qəbul ediləcəyini bildirib. O xatırladıb ki, sanksiyalar yekdilliklə qəbul olunur və indiyədək 19 paket təsdiqlənib.
Ukraynanın üzvlük perspektivinə toxunan von der Leyen bildirib ki, proses ləyaqət və islahatların icrası prinsipi əsasında aparılır. Onun sözlərinə görə, konkret tarix müəyyənləşdirmək mümkün olmasa da, Ukraynanın Aİ-yə inteqrasiya hədəflərinə çatması üçün dəstək qətidir.
Mənbə: TrtHaber