Bugun.tv xəbər verir ki, alimlər ağarmış mərcanların bərpasına kömək edə biləcək yeni üsulu laboratoriya şəraitində sınaqdan keçiriblər. Təcrübənin nəticələri mərcan riflərinin qorunması istiqamətində ümidverici hesab olunur.
Euronews-un məlumatına görə, Stanford Universitetində aparılan təcrübədə sağlam mərcan parçaları ilə təmasda saxlanılan beş ağarmış mərcan nümunəsinin hamısı yeddi həftə ərzində bərpa olunub.
Tədqiqatçılar sağlam mərcanlardan faydalı yosunların zədələnmiş mərcan hissələrinə keçdiyini müşahidə ediblər. Mərcanlarla qarşılıqlı əlaqədə yaşayan bu yosunlar onların qidalanmasında və enerji əldə etməsində mühüm rol oynayır.
Dəniz suyunun temperaturunun yüksəlməsi mərcanların həmin yosunları itirməsinə və ağarmasına səbəb ola bilər. Ağarma uzun müddət davam etdikdə mərcanların ölmə riski artır.
Yeni yanaşma zədələnmiş mərcanların bərpası üçün əlavə imkan yaratsa da, onun təbii dəniz mühitində nə dərəcədə effektiv olacağı hələ müəyyənləşdirilməlidir. Metodun geniş tətbiqi üçün əlavə tədqiqatlara ehtiyac var.
Mənbə: Euronews