Alman fermerləri bu həftəni hökumət tərəfindən aparılmış ixtisarlara qarşı federal səviyyədə etirazlarla başlayıb. Konstitusiya Məhkəməsi tərəfindən 2023-cü və 2024-cü illər üçün ümumi büdcələrin ləğv edilməsi nəticəsində Olaf Şolts hökuməti bir sıra radikal ixtisar aparmağa məcbur olub. Almaniyanın kənd təsərrüfatı sektoru isə bununla barışmayıb.
Bugun.tv alman mətbuatına istinadla xəbər verir ki, alman fermerləri növbəti dəfə küçəyə 680 traktor çıxarıb, texnikanı Branderburq qapısı qarşısında düzərək Berlinin mərkəzində yenidən hərəkəti kəsiblər. “Traktor” nümayişi də Almaniyanın qalan hissəsinə yayılıb. “Biz “işıqfor” koalisiyasının büdcə xaosuna, hökumətin səhvlərinin nəticələri bizim üzərimizə düşdüyünə görə pul ödəməliyik. Xeyir, biz razı deyilik”, – deyə hökumətdən kənd təsərrüfatı dizel yanacağı ilə əlaqədar olan ixtisarları tamamilə ləğv etməyə tələb edən Almaniya Fermerlər Assosiasiyasının prezidenti Yoaxim Rukvid bildirib. Y.Rukvid Almaniya hökumətinin qərarlarını “diktator” qərarları adlandırıb.
Etiraz aksiyaları bütün həftə ərzində davam edəcək və Berlində böyük nümayişlə başa çatacaq.
Fermerlər bildirirlər ki, indiki kənd təsərrüfatı məhsullarının qiymətlərinin endiyi vəziyyətdə dizel yanacağının 1 litrinə görə 21,48 sent miqdarında subsidiyanın ləğv edilməsi onların gəlirlərinin üçdəbiri qədər azalmasına gətirib çıxaracaq. Lakin hökumət 2024-cü il üçün büdcələrin əhəmiyyətli hissəsinə ötən ilin sonunda yenidən baxmağa məcbur edən Konstitusiya Məhkəməsinin qərarından sonra razılaşdırılmış ixtisarlar paketi çərçivəsində bu addım sayəsində 920 milyon avro qənaət etmək niyyətindədir.