Bugun.tv xəbər verir ki, Associated Press (AP) NATO ölkələrinin hava məkanında baş verən yeni insidentlə bağlı məlumat yayıb. Məlumata görə, Estoniya üzərində Ukraynaya məxsus olduğu bildirilən pilotsuz uçuş aparatı NATO döyüş təyyarəsi tərəfindən vurularaq zərərsizləşdirilib.
Hadisə Estoniyanın cənub bölgəsində qeydə alınıb. Rəsmi açıqlamalara görə, dron Rusiyaya qarşı həyata keçirilən hücumlar zamanı kursundan çıxaraq NATO hava məkanına daxil olub. NATO və Avropa İttifaqı rəsmiləri insidenti “təsadüfi sərhəd pozuntusu” kimi qiymətləndirib.
Ukrayna tərəfi isə baş verən hadisəyə görə təəssüfünü ifadə edərək bunun “qəsdən edilmədiyini” bildirib və müttəfiq ölkələrlə koordinasiyanın artırılacağını açıqlayıb. Hadisə bölgədə hava təhlükəsizliyi ilə bağlı narahatlıqları yenidən gündəmə gətirib.
Hərbi ekspertlər bildirirlər ki, son aylarda artan dron hücumları NATO sərhədlərində riskləri artırır və belə insidentlərin gələcəkdə daha ciddi gərginliyə səbəb ola biləcəyi istisna edilmir.
Mənbə: ApNews