Bugun.tv xəbər verir ki, ABŞ-də aparılan yeni araşdırma arıqlama və 2-ci tip diabetin müalicəsində istifadə olunan GLP-1 qrupuna aid preparatların çox nadir hallarda görmə sinirinin qan təchizatının pozulması ilə əlaqəli ola biləcəyini göstərib.
Rutgers Universitetinin alimlərinin Annals of Internal Medicine jurnalında dərc olunan araşdırmasında 2017–2022-ci illər arasında 18–65 yaşlı diabet xəstələrinin tibbi məlumatları təhlil edilib. Tədqiqatda semaqlutid tərkibli Ozempic və Wegovy, həmçinin tirzepatid preparatlarından istifadə edən şəxslərin göstəriciləri digər dərman qrupları ilə müqayisə olunub.
Nəticələrə əsasən, işemik optik neyropatiya adlanan görmə siniri pozğunluğu bütün qruplarda min nəfərdən birindən də az insanda qeydə alınıb. Bununla belə, GLP-1 preparatları qəbul edənlərdə hər 10 min nəfərə əlavə 3–4 hal müşahidə olunub.
Mütəxəssislər bildirirlər ki, bu xəstəlik görmə sinirinə qan və oksigen axınının qəfil azalması nəticəsində yaranır. Xəstələrdə bir gözdə bulanıq görmə, görüntünün qaralması və ya görmə sahəsinin bir hissəsinin itməsi baş verə bilər. Zədələnmə əksər hallarda qalıcı olur.
Araşdırma müəllifləri vurğulayırlar ki, müəyyən edilən risk çox aşağıdır və bu preparatların diabetə nəzarət, arıqlama, həmçinin ürək və böyrəklərin qorunması baxımından sübut olunmuş faydalarını kölgədə qoymur. Onlar dərmanların həkim məsləhəti olmadan dayandırılmamasını, lakin qəfil görmə zəifləməsi baş verdiyi halda təcili oftalmoloqa müraciət edilməsini tövsiyə edirlər.
Mənbə: mail.ru