NASAnın Artemis II missiyası çərçivəsində astronavtlar Ayın indiyədək insan gözü ilə tam müşahidə olunmamış hissələrini araşdırmaq imkanı əldə edəcəklər.
Missiyada Rid Uayzman, Viktor Qlover, Kristina Kox və Ceremi Hansen yer alır. Ekipaj Ayın həm Yerə baxan, həm də nadir hallarda müşahidə olunan uzaq tərəfini tədqiq edəcək.
Astronavtlar artıq uçuş zamanı “ay sevinci” kimi təsvir olunan emosional anlar yaşayıblar. Güclü kamera linzaları vasitəsilə onlar Ay səthində yerləşən və əvvəllər insan tərəfindən müşahidə olunmayan iri strukturları, o cümlədən 965 kilometr diametrə malik Orientale hövzəsini görüntüləyə biliblər.
Mütəxəssislərin sözlərinə görə, astronavtlar Ay səthinə təxminən 4000 mil (təxminən 6500 km) məsafədən baxsalar da, insan gözü hələ də vacib detalları seçə bilir. Bu müşahidələr Ayın geoloji quruluşu, kraterlərin yaranması və onun tarixinin öyrənilməsi üçün yeni imkanlar yaradır.
Qeyd olunur ki, əvvəlki Apollo missiyaları zamanı astronavtlar Ayın daha yaxın məsafəsindən keçsələr də, uçuş trayektoriyası və işıqlandırma səbəbindən bəzi bölgələri tam müşahidə etmək mümkün olmayıb. Artemis II isə fərqli baxış bucağı sayəsində Ayın bütöv diskini görmək imkanı yaradacaq.
Alimlər hesab edir ki, bu missiya Ayın yaxın və uzaq tərəfləri arasındakı fərqlərin — məsələn, qabıq qalınlığı, relyef və vulkanik fəaliyyət — daha yaxşı anlaşılmasına kömək edəcək.
Astronavtlar uçuş zamanı təxminən 5 saat ərzində Ayı müşahidə edəcək, müxtəlif obyektləri foto və video ilə qeydə alacaq və gördüklərini Yerə canlı şəkildə təsvir edəcəklər.
Mənbə: CNN