Bugun.tv xəbər verir ki, Avropada rekord istilər fonunda ölkələr yolları, dəmir yollarını və digər mühüm infrastrukturu qorumaq üçün yeni texnologiyalardan istifadəni genişləndirirlər.
Reuters agentliyinin məlumatına görə, yüksək temperatur nəticəsində asfalt örtüklərinin əriməsi, dəmir yolu relslərinin əyilməsi və elektrik şəbəkələrində yaranan problemlər hökumətləri innovativ həllər tətbiq etməyə vadar edib.
Böyük Britaniya, Fransa, Norveç və digər ölkələrdə dəmir yolu xətlərinin vəziyyətini izləmək üçün dronlar və süni intellekt əsaslı monitorinq sistemləri istifadəyə verilir. Bu texnologiyalar relslərdəki mümkün deformasiya və nasazlıqları əvvəlcədən müəyyən etməyə imkan verir.
İsveçdə isə relslərin həddindən artıq qızmasının qarşısını almaq məqsədilə onların müəyyən hissələri ağ rəngə boyanıb. Ağ örtük günəş şüalarını əks etdirdiyi üçün metalın temperaturunu aşağı salır və relslərin əyilmə riskini azaldır. Norveçin Oslo hava limanında isə uçuş-enmə zolaqları su ilə soyudulur və istiliyədavamlı yeni asfalt növləri sınaqdan keçirilir.
Mütəxəssislər bildirirlər ki, iqlim dəyişiklikləri səbəbindən istilərin daha uzunmüddətli və intensiv olması Avropanın onilliklər əvvəl inşa edilmiş infrastrukturunu yeni reallığa uyğunlaşdırmağı zəruri edib. Bu səbəbdən həm rəqəmsal texnologiyalar, həm də sadə mühəndislik üsulları birlikdə tətbiq olunur.
Mənbə: Reuters