Bugun.tv xəbər verir ki, ABŞ Prezidenti Donald Tramp NATO-nun Ankarada keçirilən 36-cı Dövlət və Hökumət Başçıları Zirvəsindən sonra Türkiyə Prezidenti Rəcəb Tayyib Ərdoğanın sammitin təşkilində mühüm rol oynadığını bildirib və onu “möhtəşəm lider” adlandırıb.
ABŞ-a qayıdarkən “Air Force One” təyyarəsində jurnalistlərə açıqlama verən Tramp, Türkiyə ilə münasibətlərin yüksək səviyyədə olduğunu vurğulayıb. O bildirib ki, Ankara ilə faydalı ticarət razılaşmaları əldə olunub və Türkiyə ABŞ üçün etibarlı tərəfdaş olaraq qalır. Tramp Ərdoğan haqqında danışarkən, “O, həqiqətən də möhtəşəm idi” ifadəsini işlədib.
ABŞ Prezidenti NATO Zirvəsinin uğurlu keçdiyini qeyd edərək, alyans daxilində həmrəyliyin gücləndiyini bildirib. Onun sözlərinə görə, Avropa ölkələri müdafiə xərclərinin artırılması istiqamətində ciddi addımlar atmağa razılıq veriblər və bu, NATO-nun gələcəyi üçün mühüm irəliləyiş hesab olunur.
Tramp həmçinin zirvə çərçivəsində Suriya Prezidenti Əhməd əl-Şaraa və Ukrayna Prezidenti Volodimir Zelenski ilə keçirdiyi görüşləri də müsbət qiymətləndirib. O, Şaraanın Suriyada ölkənin birləşdirilməsi istiqamətində mühüm işlər gördüyünü, Zelenski ilə görüşünün isə məhsuldar keçdiyini bildirib.
ABŞ lideri əlavə edib ki, sammit zamanı müzakirə olunan məsələlər NATO daxilində bir sıra fikir ayrılıqlarının aradan qaldırılmasına kömək edib və alyansın gələcək fəaliyyəti üçün yeni mərhələnin əsasını qoyub.
Mənbə: TrtHaber