Bugun.Tv xəbər verir ki, Sibir Federal Universitetinin alimləri bitkilərin inkişafı üçün faydalı işıq yarada bilən yeni material hazırlayıblar. Bu material gələcəkdə istixanalar və şəhər təsərrüfatları üçün daha səmərəli fitolampaların istehsalında istifadə oluna bilər.
İşıq enerjisindən daha səmərəli istifadə
Tədqiqatçıların hazırladığı yeni lüminessent şüşə bənövşəyi işığı, təxminən 400 nanometr dalğa uzunluğunda şüalanmanı, bitkilər üçün faydalı olan qırmızı işığa çevirir. Yeni materialın əsasını germanium oksidi, işıqlanmanı təmin edən əlavələri isə europium və qadolinium oksidləri təşkil edir.
Universitetin alimlərindən Lyubov Denisovanın sözlərinə görə, materialın kvant çıxımı 100 faizə yaxınlaşıb. Bu göstərici udulan işıq hissəciklərinin demək olar ki, hər birinin yeni işıq hissəciyi yaratdığını və enerji itkisinin az olduğunu göstərir.
Yeni materialın əsas üstünlüklərindən biri onun bir mərhələdə, ilkin komponentlərin əridilməsi yolu ilə hazırlana bilməsidir. Bu, istehsal prosesini sadələşdirə və xərcləri azalda bilər.
Hazırda universitetdə materialın eksperimental nümunələri əldə olunub. Alimlər fitolampalarda istifadə üçün uyğun ölçülərdə şüşənin hazırlanması üzərində işləyirlər. Yeni materialın gələcəkdə lazer texnologiyalarında və infraqırmızı şüaların çevrilməsində də tətbiqi nəzərdən keçirilir.
Mənbə: Hi-Tech Mail