Birləşmiş Millətlər Təşkilatı (BMT) Livanın paytaxtı Beyrutdakı limanda 6 il əvvəl baş vermiş böyük partlayışla bağlı məsul şəxslərin hesabat verməsinə və ədalətin təmin olunmasına çağırıb.
BMT Baş katibinin sözçüsünün müavini Fərhan Haq Nyu-Yorkda keçirilən gündəlik mətbuat konfransında Yaxın Şərqdəki son hadisələri dəyərləndirib.
Haq bildirib ki, Beyrut Limanında baş vermiş partlayışdan 6 il sonra həlak olanların xatirəsi yad edilir, sağ qalanlara, qurbanların ailələrinə və faciədən zərər çəkən hər kəsə dəstək ifadə olunur. O, qurbanlar və Livan xalqı üçün hesabatlılığın təmin edilməsi və ədalətin bərqərar olması istiqamətində səylərin yenilənməsinə çağırıb.
BMT-nin Livan üzrə xüsusi koordinatoru Jan Arnonun hadisədən zərər çəkən hər kəslə həmrəy olduğunu bildirən Haq, BMT rəsmisinin qurbanların həqiqət, ədalət və hesabatlılıq axtarışındakı qətiyyətini yüksək qiymətləndirdiyini qeyd edib.
Haq Arnonun məhkəmə proseslərinin irəlilədilməsi və yekun nəticəyə çatdırılması üçün səylərin ikiqat artırılmasının vacibliyini vurğuladığını bildirib.
BMT rəsmisi həmçinin Arnonun iş üzrə sürətli irəliləyişə şərait yaradacaq addımların atılması üçün bütün aidiyyəti tərəflərə çağırış etdiyini söyləyib. Onun sözlərinə görə, BMT Livan üzrə xüsusi koordinatorun ofisi vasitəsilə hesabatlılığın təmin olunması istiqamətində üzərinə düşən rolu yerinə yetirir.
Beyrut partlayışı
Beyrut Limanında 4 avqust 2020-ci ildə partlayıcı maddələrin saxlanıldığı anbarda əvvəlcə yanğın baş verib, daha sonra bütün şəhəri silkələyən güclü partlayış meydana gəlib.
Partlayış nəticəsində təxminən 240 nəfər ölüb, 6 min nəfər yaralanıb. Hadisə səbəbindən təxminən 300 min insanın evindən didərgin düşdüyü bildirilib.
Livan Ali Apellyasiya Məhkəməsinin o vaxtkı baş prokuroru Qassan Uveydat 25 yanvar 2023-cü ildə liman partlayışı ilə bağlı daha əvvəl mühakimə olunan bütün saxlanılan şəxslərin istisnasız olaraq azadlığa buraxılması barədə qərar verib.
Böyük Britaniyanın Ali Ədalət Məhkəməsi isə 13 iyun 2023-cü ildə Londonda yerləşən bir şirkəti liman partlayışına görə məsul hesab edərək, ölən bəzi şəxslərin yaxınlarına və yaralılara kompensasiya ödənilməsinə qərar verib.
Beyrut Limanı partlayışı ilə bağlı araşdırmanı aparan hakim Tarık Bitar əsas istintaqı 2026-cı ilin martında başa çatdıraraq işi yekun rəyin hazırlanması üçün Ali Prokurorluğa göndərib.
Mənbə: kenthaber27