Bugun.tv xəbər verir ki, Böyük Britaniya hökumətinin süni intellekt strategiyasının hazırlanmasında əsas rol oynayan Mett Klifford ABŞ-ın Anthropic şirkətinə rəhbər vəzifəyə keçib.
The Guardian yazır ki, Klifford Anthropic-də beynəlxalq əlaqələr üzrə idarəedici direktor vəzifəsini tutacaq. Onun yeni təyinatı Böyük Britaniyada mümkün maraqlar toqquşması ilə bağlı müzakirələrə səbəb olub.
Klifford daha əvvəl Baş nazir Kir Starmerə süni intellekt məsələləri üzrə məsləhətçi kimi fəaliyyət göstərib. O, həmçinin qabaqcıl elmi və texnoloji layihələri maliyyələşdirən Advanced Research and Invention Agency qurumunun rəhbəri olub.
Klifford Starmerə məsləhətçilik fəaliyyətindən istefa versə də, Aria qurumunun ödənişsiz rəhbəri vəzifəsində qalmağı planlaşdırır. Anthropic isə bildirib ki, Klifford şirkətlə bağlı Aria məsələlərində qərarvermə prosesindən kənarda qalacaq.
Britaniyalı parlament üzvləri və bəzi fəallar bu vəziyyətin dövlət və texnologiya şirkətləri arasında “fırlanan qapı” problemini gücləndirə biləcəyindən narahatdırlar.
Süni intellekt sektorunun sürətlə böyüməsi fonunda hökumət rəsmilərinin iri texnologiya şirkətlərinə keçidi getdikcə daha çox diqqət çəkir.
Mənbə: The Guardian