Bugun.tv xəbər verir ki, Böyük Britaniyada keçirilən son yerli seçkilərdən sonra ölkədə siyasi parçalanmanın daha da gücləndiyi bildirilib. “The Guardian” qəzetinin yayımladığı təhlildə qeyd olunur ki, Böyük Britaniya artıq ənənəvi iki partiyalı sistemdən uzaqlaşaraq “beş partiyalı siyasət dövrü”nə daxil olur.
Nəşrin yazdığına görə, hakim Leyborist Partiyası son seçkilərdə gözlənilən nəticəni əldə edə bilməyib. Bunun fonunda “Reform UK”, Yaşıllar Partiyası və Liberal Demokratların bəzi bölgələrdə mövqelərini gücləndirdiyi vurğulanıb.
Məqalədə həmçinin qeyd edilir ki, Baş nazir Kir Starmer üçün seçkilərin nəticələri ciddi siyasi siqnal hesab olunur. Analitiklər hesab edir ki, seçici davranışında dəyişikliklər Britaniya siyasətində uzunmüddətli transformasiyaya səbəb ola bilər.
“The Guardian”ın təhlilində xüsusilə sağ və sol siyasi qüvvələr arasında rəqabətin kəskinləşdiyi, ənənəvi partiyalara etimadın isə zəiflədiyi diqqətə çatdırılıb.
Mənbə: The Guardian