Bugun.tv xəbər verir ki, Cənubi Koreyada 2024-cü ilin dekabrında 179 nəfərin ölümü ilə nəticələnən təyyarə qəzası ilə bağlı araşdırma çərçivəsində bəzi qurumlarda axtarış aparılıb.
Yonhap xəbər agentliyinin məlumatına görə, 30 dekabr 2024-cü ildə Jeju Air şirkətinə məxsus təyyarənin qəzaya uğraması ilə bağlı istintaq davam edir.
İstintaq çərçivəsində polis Koreya Hava Limanları Korporasiyasının (KAC), Nəqliyyat Nazirliyinin və Busan Aviasiya Regional İdarəsinin binalarında axtarış aparıb.
Səlahiyyətlilər bildiriblər ki, əməliyyat zamanı məqsəd indiyədək 73 nəfərin barəsində irəli sürülən “peşəkar səhlənkarlıq” şübhəsi ilə bağlı əlavə sübutlar toplamaq olub.
Nə baş vermişdi?
Banqkok–Muan marşrutu üzrə uçan, Boeing 737-800 tipli “Jeju Air 7C2216” reysi 30 dekabr 2024-cü ildə Cənubi Koreyanın Muan şəhərində qəza keçirib.
Təyyarənin eniş qurğusu eniş zamanı açılmayıb. Təyyarədə 6 ekipaj üzvü və 177 sərnişin olmaqla, ümumilikdə 181 nəfər olub.
Təyyarə Muan Beynəlxalq Hava Limanının uçuş-enmə zolağına endikdən sonra idarəetmədən çıxaraq maneəyə çırpılıb. Qəza nəticəsində 179 nəfər həyatını itirib.
Milli Yanğınsöndürmə Xidmətinin məlumatına görə, ekipaj üzvlərindən 30 yaşlarında bir qadın və 20 yaşlarında bir kişi sağ qalıb.
Səlahiyyətlilər qəzanın təyyarənin eniş qurğusundakı problemlə əlaqəli olduğunu bildiriblər. İlk eniş cəhdində eniş qurğusu açılmayıb, ikinci cəhddə məcburi eniş zamanı təyyarə qəzaya uğrayıb.
Hadisə Cənubi Koreya aviasiya tarixinin ən çox insan itkisi ilə nəticələnən qəzası hesab olunur. Qəzadan sonra ölkədə 7 günlük milli matəm elan edilmişdi.
Mənbə: TRT Haber