Bugun.tv xəbər verir ki, Şimal yarımkürəsinin müəyyən bölgələrində 12 avqust 2026-cı ildə baş verəcək tam Günəş tutulması gündüzü qısa müddətə alatorana çevirəcək. Təbiət hadisəsi Qrenlandiya, İslandiya və İspaniyanın müəyyən əraziləri də daxil olmaqla məhdud bir xətt boyunca tam şəkildə müşahidə edilə biləcək.
Ayın Günəşi tamamilə örtəcəyi tutulma xətti Arktik okeanı üzərində başlayacaq, Şərqi Qrenlandiya, Qərbi İslandiya və İspaniyanın şimalından keçdikdən sonra Balear adaları üzərindən Aralıq dənizinə çatacaq.
Təxminən 293 kilometr genişliyində olan bu dar zolaqda yerləşən insanlar gündüz vaxtı səmanın qısa müddətə qaralmasının şahidi olacaqlar. Ayın Günəşi tamamilə örtdüyü zaman Günəşin xarici atmosferi olan tac təbəqəsini görmək mümkün olacaq.
Tam tutulma xəttindən kənarda yerləşən geniş ərazilərdə isə qismən Günəş tutulması müşahidə ediləcək. Böyük Britaniya, İrlandiya, Fransa, Almaniya, İtaliya və Skandinaviya ölkələri də daxil olmaqla Avropanın böyük hissəsində Ay Günəşin qarşısından keçərək nəzərəçarpan qaralma yaradacaq.
İspaniyanın şimalı ən məşhur məkanlardan biri olacaq
Tutulmanı yerində izləmək istəyənlər üçün İspaniyanın şimalı ən əlverişli istiqamətlərdən biri hesab olunur. Ərazinin asanlıqla əlçatan olması və tutulmanın gün batımına yaxın baş verməsi burada maraqlı görüntülərin yaranmasına imkan verəcək.
Qrenlandiya və İslandiya isə tutulmanın səmada daha yüksəkdə baş verəcəyi Arktika mənzərələri ilə fərqli müşahidə şəraiti təqdim edəcək.
Günəş tutulmasını necə təhlükəsiz izləmək olar?
Mütəxəssislər müşahidə edilən ərazidən asılı olmayaraq, lazımi qoruyucu vasitələr olmadan Günəşə birbaşa baxmağın təhlükəli olduğunu bildirirlər.
Tutulmanın qismən müşahidə edilən bütün mərhələlərində sertifikatlı Günəş tutulması eynəklərindən istifadə edilməlidir. Teleskop, durbin və kameralar üçün isə xüsusi Günəş filtrlərindən istifadə olunması vacibdir.
Qoruyucu eynəklər yalnız Ayın Günəşi tamamilə örtdüyü qısa tam tutulma mərhələsində çıxarıla bilər.
Mənbə: TRT Haber