Bugun.tv xəbər verir ki, Çin hökuməti Avropa İttifaqı ilə Pekində keçirilməsi planlaşdırılan iki mühüm yüksək səviyyəli görüşü ləğv edib.
Reuters-in məlumatına görə, ləğv olunan görüşlərdən biri rəqəmsal siyasət və texnologiya sahəsində əməkdaşlığa, digəri isə Çin ilə Aİ arasında siyasi dialoqa həsr olunmalı idi. Görüşlərin hansı səbəbdən təxirə salındığı və ya ləğv edildiyi barədə rəsmi açıqlama verilməyib.
Məlumata əsasən, bu addım Pekin və Brüssel arasında münasibətlərdə son dövrlərdə müşahidə olunan gərginliyin növbəti əlaməti kimi qiymətləndirilir. Tərəflər arasında xüsusilə ticarət, texnologiya, Çin istehsalı elektromobillərə tətbiq olunan tariflər və geosiyasi məsələlər ətrafında fikir ayrılıqları qalmaqdadır.
Ekspertlər hesab edirlər ki, görüşlərin ləğvi Çin-Aİ münasibətlərində dialoqun zəifləməsinə səbəb ola bilər. Bununla belə, tərəflərin qarşıdakı aylarda keçirilməsi planlaşdırılan sammitlər və digər diplomatik təmaslar çərçivəsində əlaqələri davam etdirməsi gözlənilir.
Qeyd edək ki, Avropa İttifaqı son illərdə Çinlə iqtisadi əməkdaşlığı qorumağa çalışsa da, təhlükəsizlik və strateji asılılıq risklərinin azaldılması istiqamətində siyasətini sərtləşdirib. Çin isə Aİ-ni qarşılıqlı faydalı əməkdaşlığı siyasi məsələlərdən ayırmağa çağırır.
Mənbə: Reuters