Bugun.tv xəbər verir ki, Çin Tayvanın Palau Respublikasında keçirilən Sakit Okean Adaları Forumunda iştirakına etiraz edib və bunun “nəticələrinin” ola biləcəyi barədə xəbərdarlıq edib. Reuters-in məlumatına görə, Çinin Sakit Okean adaları üzrə xüsusi nümayəndəsi Qian Bo Tayvanın forumun açılış mərasimində iştirakını qəbuledilməz adlandırıb.
Qian Bo bildirib ki, Pekin Tayvanın tədbirdə iştirakından ciddi narahatdır. O, mümkün nəticələrin nədən ibarət olacağını açıqlamayıb, lakin bunun təhdid olmadığını vurğulayıb. Çin Tayvanı öz ərazisinin bir hissəsi hesab edir və onun beynəlxalq tədbirlərdə iştirakına qarşı çıxır.
Tayvanın xarici işlər naziri Lin Çia-lunq isə ölkəsinin Sakit Okean dövlətləri ilə əməkdaşlığı davam etdirəcəyini bildirib. Tayvan forumda rəsmi dialoq tərəfdaşı kimi deyil, inkişaf tərəfdaşı statusunda iştirak edir. Çin isə forumun 21 dialoq tərəfdaşından biridir.
Avstraliya və Yeni Zelandiya Çinin mövqeyinə qarşı çıxaraq forumun kimin iştirak edəcəyinə özü qərar verdiyini bildiriblər. Reuters qeyd edir ki, regionda Çin və Qərb arasında təsir uğrunda rəqabət son illərdə daha da güclənib.
Mənbə: Reuters