Bugun.tv xəbər verir ki, vətəndaşların bələdiyyədən sərəncam yolu ilə aldıqları torpaq sahələrində tikilən evlərə çıxarış almaq hələ də problemdir.
Bu barədə ekspert Elnur Fərzəliyev televiziyalara müsahibəsi zamanı bildirib. O,deyir ki,“fərdi ev tikərkən torpağa çıxarış almalı və təyinatında yaşayış məntəqəsi qeyd edilməlidir”.
Onun sözlərinə görə, vətəndaşlar bələdiyyədən sərəncam yolu ilə aldıqları torpaq sahələri üzərində 100 minlərlə fərdi evlər inşa ediblər. Hazırda belə evlərə çıxarış alarkən problemlərlə rastlaşırlar.
“Bu problemin həlli ilə bağlı ölkə başçısının sərəncamı və tapşırıqları olub. Bu səlahiyyət yerli icra hakimiyyətlərinə verilib. İcra hakimiyyətləri ərazi üzrə monitorinqlər aparılmalı, sonra torpaqların təyinatı müəyyənləşdirilməlidir. Daha sonra isə digər təyinatlı torpaqlar üzərində tikilmiş fərdi yaşayış və digər təyinatlı əmlakların siyahısı aidiyyatı üzrə nazirlər kabinetinə yönəldilməlidir. Nazirlər kabineti isə torpağın təyinatı ilə bağlı müəyyən qərarlar verir”- E. Fərzəliyev bildirib.
Müxbir: İntizar Əmirov