Gigiyena vasitəsi kimi demək olar ki, hər gün istifadə etdiyimiz dezodorantın əslində düzgün vaxtda tətbiq olunmadığı ortaya çıxıb. Mütəxəssislər bildirir ki, bir çox insan onu səhər istifadə etsə də, ən effektiv vaxt axşam saatlarıdır.
International Hyperhidrosis Society-nin açıqlamasına görə, xüsusilə antiperspirant (tərləmənin qarşısını alan məhsullar) yatmazdan əvvəl tətbiq edilməlidir. Bunun səbəbi isə gecə saatlarında tər ifrazının minimum səviyyədə olmasıdır.
Mütəxəssislər qeyd edir ki, axşam istifadə olunan antiperspirantın tərkibindəki aktiv maddələr gecə boyunca dəriyə daha yaxşı nüfuz edir və səhər saatlarında tər və qoxunun qarşısını daha effektiv şəkildə alır.
Eyni zamanda vurğulanır ki, dezodorant və antiperspirant eyni məhsullar deyil. Antiperspirantlar tər vəzilərini müvəqqəti bloklayan alüminium əsaslı birləşmələr ehtiva edir və tər ifrazını azaldır. Dezodorantlar isə əsasən qoxunun qarşısını alır, bakteriyaların fəaliyyətini zəiflədir və xoş ətir verir.
Bu gün satışda olan məhsulların əksəriyyəti həm dezodorant, həm də antiperspirant xüsusiyyətlərini birləşdirir.
Ekspertlər həmçinin bildirir ki:
- Antiperspirantı qalın qatla vurmağa ehtiyac yoxdur – nazik qat kifayətdir
- Qoltuqaltı tüklərin qısaldılması məhsulun daha yaxşı təsir etməsinə kömək edir
- Stress də tər ifrazını artırır, buna görə onun idarə olunması vacibdir
Mütəxəssislərin fikrincə, səhər vurulan antiperspirant həm təsir baxımından zəif olur, həm də paltarlarda ləkələrə səbəb ola bilər.
Nəticə: Daha yaxşı effekt üçün antiperspirantı yatmazdan əvvəl təmiz bədənə tətbiq etmək tövsiyə olunur.
Mənbə: mail.ru