Braziliyada ördək və qaz qaraciyərindən hazırlanan dünyaca məşhur foie gras məhsulunun istehsalı, satışı, idxalı və ixracı qadağan edilib. Qərar ölkədə heyvan hüquqları ilə bağlı aparılan uzunmüddətli kampaniyadan sonra qəbul olunub.
Məlumata görə, Braziliya Prezidenti Luiz İnasio Lula da Silva tərəfindən təsdiqlənən yeni qanunla foie gras ölkə ərazisində tamamilə qadağan edilən məhsullar sırasına daxil olub. Bununla Braziliya Latın Amerikasında bu məhsulun həm istehsalını, həm də satışını tam dayandıran ilk ölkə olub.
Foie gras Fransız mətbəxinin ən tanınmış lüks qidalarından biri hesab olunur. Məhsul ördək və ya qazların qaraciyərinin xüsusi üsulla böyüdülməsi nəticəsində hazırlanır. İstehsal zamanı quşlara müəyyən müddət ərzində məcburi yem verilməsi heyvan hüquqları müdafiəçilərinin əsas etiraz səbəblərindən biridir.
Heyvan rifahı təşkilatları bildirirlər ki, bu üsul heyvanlara əzab verir və etik normalara uyğun deyil. Braziliyada qadağanın qəbul edilməsində Animal Equality təşkilatının təxminən altı il davam edən kampaniyası mühüm rol oynayıb.
Kampaniya çərçivəsində 310 mindən çox imza toplanıb. Qanun layihəsi Braziliya Konqresində yekdilliklə qəbul edildikdən sonra prezidentin imzası ilə qüvvəyə minib.
Mütəxəssislər hesab edirlər ki, Braziliyanın qərarı digər ölkələrdə də heyvan mənşəli lüks qidaların istehsal üsullarına dair müzakirələri gücləndirə bilər.
Mənbə: EnSonHaber