Bugun.tv xəbər verir ki, ABŞ-li tədqiqatçı və səs mühəndisi Ceff Rays Yer kürəsinin ən böyük canlı orqanizmi hesab olunan Pando adlı nəhəng ağcaqovaq koloniyasından gələn akustik titrəyişləri ilk dəfə qeydə alıb.
ABŞ-ın Yuta ştatında yerləşən Pando təxminən 43 hektar ərazini əhatə edir və vahid kök sistemi ilə bir-birinə bağlı olan 48 minə yaxın genetik cəhətdən eyni ağac gövdəsindən ibarətdir. Alimlərin hesablamalarına görə, bu canlı orqanizmin ümumi çəkisi 6 min metrik tondan çoxdur və yaşı təxminən 12 min il hesab edilir.
Eksperiment zamanı tədqiqatçı fırtına əsnasında ağacın açıq qalmış kök hissəsinə hidrofon yerləşdirib. Yazılarda yağış zamanı kök sistemi boyunca yayılan aşağı tezlikli uğultular və titrəyişlər qeydə alınıb.
Mütəxəssislər hesab edirlər ki, bu səslər yağış damcılarının ağacın yarpaqlarına və budaqlarına təsiri, torpaq sularındakı təzyiq dəyişiklikləri və ya kök sistemində rütubətin hərəkəti ilə əlaqəli ola bilər.
Alimlər bildirirlər ki, hazırda bu səslərin yalnız mexaniki təsirlərin nəticəsi, yoxsa orqanizmin bioloji vəziyyəti ilə bağlı məlumat daşıdığı hələ dəqiq məlum deyil. Bu səbəbdən əlavə araşdırmaların aparılması planlaşdırılır.
Tədqiqatçılar gələcəkdə müxtəlif fəsillərdə və hava şəraitində yeni müşahidələr apararaq Pandonun “akustik profilinin” necə dəyişdiyini öyrənmək niyyətindədirlər. Onların fikrincə, bu üsul gələcəkdə nəhəng bitki orqanizmlərinin sağlamlığının monitorinqi üçün yeni imkanlar yarada bilər.
Mənbə: mail.ru