Bugun.tv xəbər verir ki, “Əlil Qadınlar Cəmiyyəti” İctimai Birliyinin (ƏQC.İB) Qadınlara qarşı zorakılığa son qoymaq üçün BMT-nin Etimad Fondunun (UN Trust Fund) maliyyə dəstəyi ilə həyata keçirdiyi “Bakı, Gəncə şəhərləri, Qusar, Quba, Xaçmaz rayonlarında əlilliyi olan qadın və qızların ictimai xidmətlərə çıxışının təkmilləşdirilməsi” layihəsi çərçivəsində Bakı şəhərində Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinin əməkdaşlarına təlim keçilib.
Peşəkar təlimçi, Etika Akademiyasının təsisçisi və direktoru Günel İbrahim, dövlət, vətəndaş cəmiyyəti və özəl təşkilatların da iştirakı etdiyi təlimdə əlilliyi olan qadın və qızlara qarşı ictimai yerlərdə münasibətin dəyişməsi, zorakılıq hallarının qarşısının alınması, dövlət qurumlarında müyəssərliyinin və xidmət keyfiyyətinin yaxşılaşdırılması məsələlərinə diqqət çəkib.
Bu barədə “Əlil Qadınlar Cəmiyyəti” İctimai Birliyinin sədri Məhluqə Qaramanlı məlumat verib. “Əlilliyi olan insanlarla birbaşa ünsiyyətdə olan, davamlı şəkildə sosial sahədə fəaliyyət göstərən Dövlət Tibbi-Sosial Ekspertiza və Reabilitasiya Agentliyinin işçilərinə və xidmət personalına əlilliyi olan qadınlar və qızlarla peşəkar ünsiyyət qaydalarına dair təlim təşkil edib”.
Bundan başqa G.İbrahim koordinasiya şurasının üzvlərinə praktiki təlimat keçib. Əlilliyi olan qadınlar və ailə üzvləri üçün faydalı olan müxtəlif dövlət xidmətləri barədə, o cümlədən onlara qarşı zorakılığın müxtəlif formalarının tanınması ilə bağlı təlimatlandırılma aparılıb.
Təlimçi 30 nəfərin iştirak etdiyi tədbirdə, ümumilikdə, aşağıdakı sahələr üzrə geniş təlim keçib:
- Birgə yaşamaq mədəniyyəti ;
- Etik davranıış qaydaları;
- Əlilliyi olan qadınlarla davranış etikası; Öhdəliklərimiz;
- İctimaiyyətin vəzifəsi
- Beyin alimlərinin ixtiraları əsasında davranış kodları.
- Emosional zəka meyyarları
- Xüsusi bədən dili.
- İş mühitində qeyri verbal göndərmələr xəritəsi.
- Nitq Formulaları : Xarizmatik nitq. Mütəxəssis nitqi. Motivasiya nitqi.
- Narazılıqları sürətli dəf etmə texnikası
- Neyro Estetika- beyin məşqləri. Stresədavamlılıq.
Qeyd edək ki, Bakı, Gəncə şəhərləri və Quba, Qusar, Xaçmaz rayonlarını əhatə edən layihə 2025-ci ilin avqust ayınadək (cəmi 36 ay) davam edəcək.