ABŞ alimləri gözlənilməz nəticəyə gəlib: uzun illər faydalı hesab olunan bəzi maddələr xərçəng hüceyrələrinin inkişafına kömək edə bilər.
Rochester Universiteti nəzdində fəaliyyət göstərən Wilmot Cancer Institute alimləri müəyyən ediblər ki, güclü antioksidant olan qlutation xərçəng şişləri üçün “yanacaq” rolunu oynaya bilər.
Qlutation necə təsir edir?
Qlutation təxminən 100 ildir ki, elmdə tanınır və əsasən:
- hüceyrələri oksidləşdirici stressdən qoruyur
- toksinləri zərərsizləşdirir
- immun sistemini dəstəkləyir
- qocalmanı ləngidir
Lakin yeni araşdırma göstərib ki, xərçəng hüceyrələri bu maddədən qida mənbəyi kimi istifadə edə bilir.
Alimlər döş xərçəngi nümunələrini araşdırarkən şişlərin daxilində yüksək miqdarda qlutation aşkarlayıblar. Bu isə şişlərin həmin maddəni aktiv şəkildə “istifadə etdiyini” göstərir.
Tədqiqatın nəticələri
Eksperimentlər zamanı şişlərin qlutationdan istifadə etmə qabiliyyəti bloklandıqda onların böyüməsi yavaşlayıb. İlkin nəticələr göstərir ki, bu hal təkcə bir növ deyil, bir çox xərçəng növlərinə aid ola bilər.
Araşdırma həmçinin göstərir ki, antioksidantlar hər zaman yalnız faydalı olmaya bilər və bəzi hallarda əks təsir göstərə bilər.
Mütəxəssislər nə deyir?
Alimlər vurğulayır ki:
- bu nəticələr qida əlavələrinə ehtiyatla yanaşmağın vacibliyini göstərir
- lakin meyvə və tərəvəzlərdən imtina etmək doğru deyil
- balanslı qidalanma bədən çəkisini tənzimləyir, iltihabı azaldır və immun sistemi gücləndirir.
Gələcək planlar
Tədqiqatçılar artıq qlutationun şişlər tərəfindən istifadəsini bloklayan preparat üzərində işləyirlər. Məqsəd bu mexanizmi daha dəqiq hədəfləyən yeni müalicə üsulları hazırlamaqdır.
Araşdırmanın nəticələri nüfuzlu Nature jurnalında dərc olunub.
Mənbə: mail.ru