“ABŞ-ın Ukraynadakı münaqişəni həll etmək üçün irəli sürdüyü strategiya effektiv deyil və danışıqları çıxılmaz vəziyyətə salıb”.
Bu barədə Foreign Affairs jurnalında dərc olunan məqalədə bildirilir.
Nəşrin yazdığına görə, Donald Trump administrasiyasının rəhbərliyi ilə aparılan danışıqlar nəticə vermir. Bunun səbəblərindən biri diqqətin İran ilə bağlı gərginliyə yönəlməsi olsa da, əsas problem təklif olunan sülh modelinin özündədir.
Məqalədə qeyd olunur ki, ABŞ-ın indiyədək əsas yanaşması belə olub: Ukrayna münaqişəni bitirmək üçün ərazilərinin bir hissəsini Rusiyaya verməli, bunun qarşılığında isə Qərbdən təhlükəsizlik zəmanətləri almalıdır. Lakin bu model nə indiyə qədər işləyib, nə də gələcəkdə işləyəcəyi ehtimal olunur.
Analitiklər hesab edir ki, bu yanaşma Rusiyanın ərazi iddialarının əhəmiyyətini şişirdir, eyni zamanda Ukrayna üçün Qərb zəmanətlərinin rolunu düzgün qiymətləndirmir. Bundan əlavə, əsas problem – tərəflərin bir-birinə sülhə sadiq olduqlarına inanmasının çətinliyi – nəzərə alınmır.
Jurnal vurğulayır ki, effektiv həll yolu üçün daha kompleks yanaşma tələb olunur. Bu çərçivədə Kiyevə özünümüdafiə imkanları verilməli, Moskva isə Ukraynanın NATO üçün platformaya çevrilməyəcəyinə dair təminatlar almalıdır.
Sonda qeyd olunur ki, sülh danışıqları sadəcə ərazi mübadiləsi kimi deyil, uzunmüddətli sabit münasibətlərin qurulması üçün başlanğıc nöqtəsi kimi dəyərləndirilməlidir.
Mənbə: mail.ru