ABŞ-də alimlər bahalı metallardan istifadə etmədən günəş işığı vasitəsilə sudan təmiz hidrogen qazı istehsal edən yeni kristal material hazırlayıblar.
Bugun.Tv xəbər verir ki, Oregon Dövlət Universitetinin kimya mühəndisləri günəş işığını birbaşa istifadə etməklə suyu parçalaya bilən və əlavə bahalı metal katalizatorlara ehtiyac duymayan yeni fotokatalitik material sinfi hazırlayıblar.
Alimlər araşdırmada metal-orqanik qəfəs quruluşuna malik “BVR-19” adlı kristal materialı tədqiq ediblər. Bildirilib ki, material otaq temperaturunda sulu məhlulda əlavə enerji tələb etmədən reaksiyanın başlamasına imkan verir və günəş işığı altında suyun parçalanması prosesini əhəmiyyətli dərəcədə sürətləndirir.
Kükürd bağları elektron axınını təmin edir
Tədqiqatçılar müəyyən ediblər ki, materialın tərkibindəki kükürd-kükürd kimyəvi bağları işıq təsirinə məruz qaldıqda müvəqqəti olaraq parçalanır. Nəticədə yaranan yüksək reaktiv kükürd birləşmələri suyun hidrogen və oksigenə ayrılması üçün lazım olan elektron axınını təmin edir.
Bu prosesdə platin və ya palladium kimi qiymətli metallardan istifadə əvəzinə materialın tərkibindəki üzvi kükürd strukturları katalitik yükü öz üzərinə götürür.
Yaşıl hidrogenin istehsalını ucuzlaşdıra bilər
Araşdırmanın müəllifi Kyriakos Stylianou bildirib ki, materialın müxtəlif metal nüvələri dəyişdirilərək onun fotokatalitik imkanları araşdırılıb. Onun sözlərinə görə, əldə olunan nəticələr günəş işığını birbaşa saxlanıla bilən təmiz yanacağa çevirən yeni nəsil qurğuların istehsal xərclərinin əhəmiyyətli dərəcədə azaldılmasına imkan verə bilər.
Tədqiqatçılar yeni materialın ənənəvi elektroliz üsulları ilə müqayisədə daha iqtisadi yaşıl hidrogen istehsalına yol aça biləcəyini bildiriblər.
Mənbə: TRT Haber