Bugun.tv xəbər verir ki, İsrailin “Haaretz” qəzeti Baş nazir Binyamin Netanyahu hökumətinin siyasətinin ölkənin ABŞ-dakı nüfuzuna mənfi təsir göstərdiyini yazıb.
Qəzetin 25 sentyabr tarixli redaksiya məqaləsində İsrailin ABŞ başda olmaqla əsas müttəfiqləri ilə münasibətlərində ciddi böhran yaşandığı bildirilib. Məqalədə Netanyahu hökumətinin siyasətinin Vaşinqtonla münasibətlərə təsir göstərdiyi və İsrailin ABŞ-da həm Respublikaçılar, həm də Demokratlar arasında dəstəyinin zəiflədiyi iddia olunub.
“Haaretz” bu vəziyyətin səbəbləri sırasında Qəzza zolağındakı müharibəni, İordan çayının qərb sahilində israilli köçkünlərin zorakılığını, İranla bağlı müharibəni və bunun ardınca neft qiymətlərinin artmasını, həmçinin Şərqi Qüdsdə xristianlara qarşı hücumlarla bağlı xəbərləri qeyd edib.
Məqalədə ABŞ-da, xüsusilə gənclər arasında İsrailə müsbət münasibətin azaldığına dair sorğulara da diqqət çəkilib.
Qəzet həmçinin ABŞ Prezidenti Donald Trampın İsrailə münasibətində dəyişiklik müşahidə edildiyini iddia edib və Netanyahu hökumətinin İsrailin ABŞ ictimaiyyətindəki imicinin zəifləməsinə cavab vermədiyini yazıb.
Mənbə: TrtHaber