Bugun.tv xəbər verir ki, Hindistanda aparılan yeni araşdırma ölkədə ekstremal istilərin insan həyatı üçün yaratdığı təhlükənin rəsmi statistikadan qat-qat böyük olduğunu ortaya qoyub.
Euronews-un yaydığı məlumata görə, tədqiqat nəticələri göstərir ki, bir günlük kəskin istilik dalğası ölkə üzrə orta hesabla 3400 əlavə ölümə səbəb olur. Beş gün davam edən istilik dalğası zamanı isə əlavə ölüm sayı təxminən 30 minə çata bilər.
Araşdırmada bildirilir ki, Hindistanda rəsmi olaraq istilərlə əlaqələndirilən ölüm halları ildə 500-1500 arasında göstərilsə də, faktiki rəqəmlərin bundan xeyli yüksək olduğu ehtimal edilir. Mütəxəssislər bunun əsas səbəbi kimi istilərin ürək-damar, tənəffüs və digər xəstəlikləri ağırlaşdıraraq dolayı ölümlərə səbəb olmasını göstərirlər.
Tədqiqat müəlliflərinin hesablamalarına görə, ən ağır vəziyyət ölkənin sıx məskunlaşmış və iqtisadi cəhətdən daha həssas bölgələrində müşahidə olunur. Xüsusilə Uttar-Pradeş ştatı istilik dalğalarından ən çox zərər görən ərazilərdən biri hesab edilir.
Mütəxəssislər xəbərdarlıq edirlər ki, iqlim dəyişikliyi fonunda istilik dalğalarının daha tez-tez və daha uzunmüddətli olması gözlənilir. Bu səbəbdən yerli hakimiyyət orqanlarının erkən xəbərdarlıq sistemlərini gücləndirməsi, səhiyyə infrastrukturunu uyğunlaşdırması və əhalinin qorunması üçün əlavə tədbirlər görməsi vacib hesab olunur.
Mənbə: Euronews