Bugun.tv xəbər verir ki, bu gün keçmiş SSRİ və Rusiyanın ən məşhur animasiya studiyalarından biri olan “Soyuzmultfilm”in yaradılmasının 90 illiyi tamam olur.
Studiya 1936-cı il iyunun 10-da təsis edilib və ötən dövr ərzində minlərlə animasiya filmi və serialı ilə bir neçə nəslin uşaqlıq xatirələrinin ayrılmaz hissəsinə çevrilib.
Məlumata görə, studiya ilk fəaliyyət illərində “V Afrike Jarko” adlı qısametrajlı animasiya filmi ilə çıxış edib. Sonrakı illərdə isə “Vinni Pux”, “Nu, Poqodi!”, “Uçan gəmi”, “Çeburaşka” və digər məşhur ekran əsərləri milyonlarla tamaşaçının rəğbətini qazanıb.
Yubiley münasibətilə 2026-cı il ərzində müxtəlif ölkələrdə xüsusi nümayişlər, mədəni tədbirlər və animasiya layihələrinin təqdimatı planlaşdırılır.
Bu məqsədlə “Roskino” və “Soyuzmultfilm” beynəlxalq nümayiş proqramı hazırlayıb.
Hazırda studiya klassik animasiya irsini qorumaqla yanaşı, yeni layihələr üzərində də işləyir. Rəhbərlik tərəfindən verilən məlumata görə, “Soyuzmultfilm”də təxminən 20 tammetrajlı film layihəsi hazırlanır və onların bir hissəsi studiyanın məşhur personajlarına əsaslanır.
90 illik tarixə malik “Soyuzmultfilm” bu gün də postsovet məkanında animasiya sənayesinin ən tanınmış brendlərindən biri hesab olunur.
Mənbə: Calend.Ru