Bugun.tv xəbər verir ki, Yaxın Şərqdə enerji təchizatı ilə bağlı narahatlıqların və neft tankerlərinə hücumların artmasının fonunda dünya bazarında neftin qiyməti yüksəlib.
Reuters-in məlumatına görə, Brent markalı neftin qiyməti 8 oktyabr səhərində 2,28 faiz artaraq bir barel üçün 102,28 dollara çatıb. ABŞ-ın Qərbi Texas markalı xam neftinin (WTI) qiyməti isə 1,66 dollar yüksələrək 89,94 dollar olub.
Tankerlərə hücumlar rekord həddə çatıb
Hörmüz boğazında neft, mayeləşdirilmiş təbii qaz və mayeləşdirilmiş neft qazı daşıyan tankerlərə hücumların sayı son günlərdə əhəmiyyətli dərəcədə artıb.
Reuters-in məlumatına görə, sentyabrın 28-dən oktyabrın 5-dək olan həftədə boğaz və ətrafında ən azı 12 hücum, hücuma cəhd və gəmi heyətlərinə təzyiq halları qeydə alınıb. Bu, ABŞ-İran müharibəsinin başladığı fevralın 28-dən bəri bir həftə ərzində qeydə alınan ən yüksək göstəricidir.
Hörmüz boğazından müharibədən əvvəl dünya üzrə neft və yanacaq daşımalarının təxminən 20 faizi keçirdi. Hücumların artması isə yükdaşıma və sığorta xərclərini yüksəldərək enerji bazarında əlavə təzyiq yaradır.
ABŞ-da hasilatın azalması da qiymətlərə təsir edib
Neft qiymətlərinin artmasına ABŞ-ın Meksika körfəzində hasilatın müvəqqəti azaldılması da təsir göstərib. “İsaias” qasırğasının yaxınlaşması ilə əlaqədar bəzi enerji şirkətləri dənizdəki fəaliyyətlərini dayandırıblar.
Bununla yanaşı, ABŞ-da xam neft ehtiyatlarının gözləniləndən daha çox azalması da qiymət artımını dəstəkləyən amillərdən biri olub.
Mənbə: Reuters