Bugun.tv xəbər verir ki, Kanadanın Alberta əyalətində yerləşən Ueynrayt hərbi bazasında baş verən otlaq yanğını nəticəsində dörd hərbçi ölüb, 39 nəfər yaralanıb. Yaralılardan 19-nun vəziyyətinin ağır olduğu bildirilib.
Al Jazeera-nın dərc etdiyi məlumata görə, hadisə hərbi təlimlər zamanı baş verib. Həmin vaxt bazada canlı döyüş sursatlarından istifadə olunmaqla hazırlıq məşqləri keçirilirdi. İlkin mərhələdə yanğının nəzarət altına alına biləcəyi düşünülsə də, küləyin istiqamətinin qəfil dəyişməsi alovun sürətlə yayılmasına səbəb olub.
Kanada hərbçilərinin açıqlamasına əsasən, alov cəmi 36 saniyə ərzində təxminən bir kilometr məsafə qət edib. Güclü külək yanğının istiqamətini dəyişdirərək təlim iştirakçılarının olduğu əraziyə yayılmasına şərait yaradıb. Həmin gün Alberta əyalətinin bəzi hissələrində küləyin sürəti saatda 100 kilometrə çatıb.
Yanğın zamanı təxminən 84 hərbçi iki ayrı təlim sahəsində olub. Alov hücum məşqlərinin keçirildiyi əraziyə keçərək əsgərləri təhlükə altında qoyub.
Kanadanın baş naziri Mark Karni hadisəni ölkənin sülh dövründə hərbi qüvvələri üçün ən ağır faciələrdən biri kimi qiymətləndirib.
Hadisənin dəqiq səbəbi ilə bağlı araşdırma aparılır. Hərbi rəsmilər yanğının qaz və ya neft infrastrukturu ilə bağlı partlayış nəticəsində baş verdiyinə dair ehtimalların araşdırma ilə təsdiqlənmədiyini bildiriblər.
Mənbə: Al Jazeera